नेपालबाट १६५० मेगावाट विद्युत लैजान भारत तयार, यस्ता छन् ऊर्जा सचिवस्तरीय बैठकका सहमति

काठमाडौं । नेपालबाट १६५० मेगावाट विद्युत लैजानन भारतले सहमति जनाएको छ । दुई देशका ऊर्जा सचिवस्तरीय संयुक्त निर्देशक समितिको बैठकमा भारतले नेपालबाट थप विद्युत लैजान सहमति जनाएो हो । अब भारतले थप ५५० मेगावाट विद्युत लैजाने छ ।

नयाँ सहमतिसँगै वर्षायाममा नेपालमा बिजुली खेर जाने समस्या समाधानमा सहयोग पुग्नेछ । अहिले भारतले वर्षायाममा ११०० मेगावाट विद्युत लैजाने गरेको छ । त्यसैगरि सुक्खायाममा नेपाललाई थप ४०० मेगावाट बिजुली दिन भारत तयार भएको छ । हाल भारतबाट १००० मेगावाट बिजुली आयात गर्ने अनुमति रहेकामा अब १४०० मेगावाटसम्म आयात गर्न पाईने गरि सहमति भएको हो ।

दुई देशका ऊर्जा सचिवको बुधबार पोखरामा बसेको बैठकले हाल सञ्चालनमा रहेको ढल्केबर-मुजफ्फरपुर ४०० केभी अन्तरदेशीय प्रसारण लाइनबाट भइरहेको विद्युत आयात-निर्यातको समीक्षासमेत गरिएको छ ।

बैठकको अध्यक्षता ऊर्जा सचिव सरिता दवाडीले गरेकी थिइन् भने भारतीय टोलीको नेतृत्व त्यहाँको विद्युत मन्त्रालयका सचिव पंकज अग्रवालले गरेका थिए । त्यसअघि सहसचिवस्तरीय संयुक्त कार्यदलको वैठक मंगलबार बसेको थियो । सोही बैठकले गरेका सिफारिसका आधारमा भारतले नेपालबाट थप बिजुली लैजान सहमति दिएको जनाएको छ ।

सचिवस्तरीय बैठकले चमेलिया (नेपाल) देखि धौलीगंगा (भारत) सम्मको २२० केभी डबल सर्किट प्रसारण लाइनको विस्तृत आयोजना प्रतिवेदन (डीपीआर) स्वीकृत गरेको छ । यो आयोजना सन् २०२८ को डिसेम्बरभित्र निर्माण सम्पन्न गर्ने लक्ष्य छ ।

बैठकमा दुई देशबीचको सीमापार विद्युत् प्रसारण पूर्वाधारको सुदृढीकरण, विस्तार, विद्युत् व्यापारमा सहजीकरण तथा विगतका द्विपक्षीय सहमति र समझदारीहरूको कार्यान्वयन समीक्षाका विषयमा समेत छलफल भएको छ ।

यस्तो छ प्रेस विज्ञप्ति