बेबी पाउडरबाट क्यान्सर प्रकरणमा जोन्सन एन्ड जोन्सनले ५ अर्ब ५० करोड डलर क्षतिपूर्ति दिन प्रस्ताव

काठमाडौँ । अमेरिकी स्वास्थ्य सामग्री उत्पादक कम्पनी जोन्सन एन्ड जोन्सनले बेबी पाउडरसहित टाल्कयुक्त उत्पादनका कारण डिम्बाशयको क्यान्सर भएको दाबी गर्दै दायर गरिएका हजारौँ मुद्दा टुंग्याउन अधिकतम ५ अर्ब ५० करोड अमेरिकी डलर क्षतिपूर्ति दिन प्रस्ताव गरेको छ ।

न्यु जर्सीस्थित कम्पनीले लामो समयदेखि अदालतमा चलिरहेको कानुनी विवाद अन्त्य गर्ने उद्देश्यले उक्त प्रस्ताव अघि सारेको हो । कम्पनीका अनुसार यो सम्झौताले करिब ६९ हजार टाल्कसम्बन्धी बाँकी अधिकांश मुद्दा समेट्नेछ ।

कम्पनीले आगामी वर्ष ३ अर्ब अमेरिकी डलर सम्म भुक्तानी गर्ने र सन् २०२८ अघि थप रकम तिर्नु नपर्ने जनाएको छ । तर, यो प्रस्ताव अन्तिम रूपमा लागू हुन राज्य तथा सङ्घीय अदालतमा रहेका डिम्बाशयको क्यान्सरसँग सम्बन्धित ९५ प्रतिशत दाबी गर्ने पक्षका कानुनी प्रतिनिधिहरूको सहमति आवश्यक पर्ने बताइएको छ ।

कम्पनीका उपाध्यक्ष एरिक हासले आरोपहरू आधारहीन रहेको दाबी गर्दै कम्पनीले कुनै गल्ती स्वीकार नगरी विवाद अन्त्यका लागि सम्झौताको बाटो रोजेको बताएका छन् । उनका अनुसार कम्पनी अदालतमा गएका अधिकांश मुद्दामा सफल भएको र बाँकी मुद्दामा पनि अन्ततः जित्नेमा विश्वस्त थियो ।

बेबी पाउडरमा प्रयोग हुने टाल्क म्याग्नेसियम, सिलिकन, अक्सिजन र हाइड्रोजनबाट बनेको प्राकृतिक खनिज हो। यसको नरम र चिल्लो गुणका कारण लामो समयदेखि बेबी पाउडरमा प्रयोग हुँदै आएको छ ।

यद्यपि, उपभोक्ता र उनीहरूका परिवारले टाल्कमा क्यान्सर गराउने एस्बेस्टस मिसिएको हुन सक्ने दाबी गर्दै सन् २००९ देखि कम्पनीविरुद्ध मुद्दा दायर गर्न थालेका थिए । एस्बेस्टस क्यान्सर गराउने पदार्थका रूपमा चिनिन्छ र टाल्क निकालिने खानी नजिकै पाइने भएकाले दूषित हुने जोखिम रहेको आरोप लगाइएको छ ।

कम्पनीले भने आफ्नो टाल्कयुक्त उत्पादन सुरक्षित रहेको, त्यसमा एस्बेस्टस नभएको र क्यान्सर नहुने कुरा विभिन्न अध्ययनले पुष्टि गरेको दाबी गर्दै आएको छ ।

यसैबीच, सन् २०२२ मा जोन्सन एन्ड जोन्सनले विश्वभर टाल्कयुक्त बेबी पाउडरको उत्पादन र बिक्री बन्द गर्ने निर्णय गरेको थियो । त्यसअघि नै अमेरिकामा उक्त उत्पादनको बिक्री रोकिएको थियो । कम्पनीले त्यसबेला विश्वव्यापी उत्पादन रणनीतिअनुसार टाल्कको सट्टा मकैको स्टार्चबाट बनाइने बेबी पाउडर मात्रै उत्पादन गर्ने निर्णय गरिएको जनाएको थियो ।