निर्मल पुर्जा उर्फ निम्स दाइः हिमालबाट परिचय हिमालमै अन्त

काठमाडौं । विश्वप्रसिद्ध नेपाली पर्वतारोही निर्मल पूर्जा ‘निम्स दाइ’ कोे पाकिस्तानको हिमपहिरोमा परी निधन भएको छ । सो पहिरोमा परि ब्रोड पिक हिमाल आरोहण टोलीका सबै सदस्य (१० जना) को निधन भएको हो ।

पाकिस्तानको कराकोरम हिमशृङ्खलामा अवस्थित ८ हजार ४७ मिटर अग्लो ब्रोड पिकमा बिहीबार आएको हिमपहिरोमा परेर बेपत्ता भएका भएका उनीहरुको निधन भएको बताइएको छ । प्रारम्भिक अन्तर्राष्ट्रिय सञ्चारमाध्यमहरूले निर्मल पूर्जासहित १० जना आरोही हिमपहिरोमा परेको र खोज तथा उद्धार कार्य जारी रहेको जनाएको थियो।

आरोहण टोलीमा ६ जना नेपालीसहित एक अमेरिकी, एक चिनियाँ, एक ओमानी तथा अन्य अन्तर्राष्ट्रिय आरोही सहभागी थिए । हिमपहिरोपछि सम्पर्कविहीन बनेका आरोहीहरूको खोजीका क्रममा ड्रोनबाट क्याम्प-१ नजिकै थप शवहरू देखिएपछि उद्धार टोली घटनास्थल पुगेको थियो । पाकिस्तान सेनाका हेलिकोप्टर तथा स्थलमार्गबाट खटिएका उद्धारकर्मीहरूले खोजी कार्य अघि बढाएका थिए । उच्च हिमाली क्षेत्रको प्रतिकूल मौसम, भीरालो भूभाग तथा ६ हजार मिटरभन्दा माथिको जोखिमपूर्ण अवस्थाका कारण उद्धार कार्य अत्यन्त कठिन बनिरहेको अवस्थामा केही शव फेला परेको जनाइएको छ । 

पाकिस्तानको ब्रोड पिक हिमालको हिमपहिरोमा परी निम्स दाइसहित पुरबहादुर गुरुङ, निमा शेर्पा, किली पेम्बा शेर्पा, ग्यालु शेर्पा र नवाङ थिन्दु शेर्पाको निधन भएको छ । बिहीबारदेखि हराइरहेका आरोहीको मृत्युबारेको पुष्टि शनिबार गरिएको हो । प्रधानमन्त्री बालेन्द्र शाहले ६ जना नेपालीको निधनमा दुःख व्यक्त गर्दै श्रद्धाञ्जली अर्पण गरेका छन् ।

निर्मल पूर्जा नेपाली पर्वतारोहण क्षेत्रका विश्वव्यापी चिनारी थिए । सन् २०१९ मा विश्वका ८ हजार मिटरभन्दा अग्ला सबै १४ हिमाल केवल ६ महिना ६ दिनमा आरोहण गरेर विश्व कीर्तिमान कायम राखेका निर्मल पुर्जा साहसिक यात्रालाई विश्वभर प्रशंसा गर्ने गरिएको छ । नेटफ्लिक्सको निर्मल पुर्जाका विषयमा वृत्तचित्र बनाई विश्वभर परिचित बनाउन भुमिका खेलेको थियो । नेटफ्लिक्सको वृत्तचित्र ‘फोर्टिन पीक्सः नथिङ इज इम्पोसिबल’ ले १४ वटा ८ हजारमिटरभन्दा अग्ला हिमालको आरोहण अभियानलाई विश्वभरका दर्शकमाझ पुर्‍याएपछि निर्मल पुर्जा पर्वतारोहणको सीमित घेराभन्दा बाहिर चिनिने अन्तर्राष्ट्रिय सेलिब्रिटी बनेका थिए । 

बेलायती सेनामा १६ वर्ष बिताएका पुर्जाको पर्वतारोहणप्रति विशेष रुचि थियो । असाधारण पर्वतारोहण उपलब्धिका लागि सन् २०१८ मा तत्कालीन बेलायती महारानी एलिजाबेथ द्वितीयबाट पुर्जालाई एमबीई (मेम्बर अफ द अर्डर अफ तजभ ब्रिटिस इम्पायर) सम्मान प्रदान गरिएको थियो । यो उत्कृष्ट उपलब्धिका लागि प्रदान गरिने नागरिक सम्मान हो । दक्षिणी बेलयातको इस्टलेइ बरोमा रहेको नेपाली समुदायका सदस्य पुर्जालाई सन् २०२१ मा ‘अनररी फ्रिडम अफ द बरो’ सम्मान पनि दिइएको थियो । यो इस्टलेइ बरो काउन्सिलले प्रदान गर्न सक्ने सबैभन्दा उच्च सम्मान हो । 

निर्मल पुर्जाको कम्पनी एलिट एक्स्पेडले वक्तव्यमा भनेको छ, ‘आज हामी अत्यन्तै गहिरो दुःख र हृदयविदारक पीडाका साथ ब्रड पिकमा आएको हिमपहिरोपछि निर्मल ‘निम्सदाइ’ पुर्जाको दुःखद् निधन भएको पुष्टि गर्दछौं । साथै, अभियानका अन्य सदस्यहरू पनि जीवित नरहेको पुष्टि भएको छ । उनको दूरदृष्टि, नेतृत्व र दृढ संकल्पले एलिट एक्स्पेड, निम्सदाइ फाउन्डेसन, स्काइडाइभ निम्सदाइ र निम्सदाइ स्टोरलाई आजको स्थानमा पुर्‍यायो । उनले परिवर्तन ल्याएका असंख्य जीवन र प्रेरित गरेका मानिसहरूमार्फत उनको योगदान सधैं जीवित रहनेछ ।’