नेपाल टेलिकमले 'स्टक ब्रोकर' छनोट गर्दै, १० अर्बभन्दा बढी औसत कारोबार अनिवार्य

काठमाडौं । नेपाल टेलिकमले आर्थिक वर्ष २०८३/८४ का लागि आफ्नो धितोपत्र कारोबारमा सेवा दिने 'स्टक ब्रोकर' कम्पनीहरूको सूची तयार गर्ने प्रक्रिया अघि बढाएको छ । यसका लागि टेलिकमले योग्य धितोपत्र दलाल कम्पनीहरूबाट सूचीकरणका लागि प्रस्ताव माग गरेको हो ।

टेलिकमका अनुसार इच्छुक तथा योग्यता पुगेका ब्रोकर कम्पनीहरूले सूचना प्रकाशित भएको मिति भदौ ८ गतेदेखि १५ दिनभित्र कार्यालय समयमा आफ्नो प्रस्ताव भद्रकालीस्थित नेपाल टेलिकमको केन्द्रीय कार्यालयमा दर्ता गराउनुपर्नेछ । सूचीकरणका लागि आवश्यक प्रस्ताव फाराम टेलिकमबाट निःशुल्क प्राप्त गर्न सकिनेछ ।

ब्रोकर कम्पनी छनोटका लागि टेलिकमले विभिन्न मापदण्ड तोकेको छ । प्रस्ताव पेश गर्ने कम्पनी प्रचलित कानुनअनुसार दर्ता भएको हुनुपर्नेछ भने नेपाल धितोपत्र बोर्डबाट आवश्यक अनुमति प्राप्त गरी त्यसलाई नवीकरणसमेत गरेको हुनुपर्नेछ । साथै, स्थायी लेखा नम्बर लिएको र बोर्डले तोकेको न्यूनतम चुक्ता पुँजी कायम गरेको हुनुपर्नेछ ।

त्यस्तै, आर्थिक वर्ष २०८१/८२ मा कम्पनीको नेट वर्किङ क्यापिटल धनात्मक रहेको र सोही आर्थिक वर्षको कर चुक्ता गरेको प्रमाणसमेत आवश्यक पर्नेछ । व्यावसायिक अनुभव र कारोबारको आकारलाई पनि ब्रोकर छनोटमा महत्वपूर्ण आधार बनाइएको छ । पछिल्ला दुई आर्थिक वर्ष अर्थात् २०८०/८१ र २०८१/८२ मा ब्रोकर कम्पनीले गरेको धितोपत्र कारोबारको औसत वार्षिक रकम कम्तीमा १० अर्ब रुपैयाँभन्दा बढी हुनुपर्नेछ ।

यसका अतिरिक्त, सम्बन्धित कम्पनीले धितोपत्र दलालका रूपमा कम्तीमा दुई वर्षको अनुभव हासिल गरेको हुनुपर्नेछ । कम्तीमा एउटा पूर्ण वा आंशिक सरकारी स्वामित्व रहेको कम्पनी वा अन्य संगठित संस्थालाई एक वर्षसम्म ब्रोकर सेवा प्रदान गरेको अनुभव पनि अनिवार्य गरिएको छ ।

कानुनअनुसार धितोपत्र कारोबार गर्न अयोग्य नरहेका तथा टेलिकमले तोकेका सबै मापदण्ड पूरा गर्ने ब्रोकर कम्पनीहरूले आफ्नो कम्पनी प्रोफाइलसहित प्रस्ताव पेश गर्न सक्नेछन् । प्राप्त प्रस्तावका आधारमा नेपाल टेलिकमले आर्थिक वर्ष २०८३/८४ का लागि योग्य ब्रोकरहरूको सूची तयार गर्नेछ ।