गगन थापा पक्राउको हल्लाबीच कांग्रेसले बोलायो पदाधिकारी बैठक

काठमाडौं । नेपाली कांग्रेसले सभापति गगन थापा पक्राउ पर्न सक्ने चर्चाबीच आज पदाधिकारी बैठक बोलाएको छ । सहमहामन्त्री रामहरि खतिवडाका अनुसार बैठक दिउँसो ३ बजे बस्नेछ । सभापति थापालाई प्रहरीले पक्राउ गर्ने हल्ला फैलिरहेका बेला कांग्रेसले समसामयिक राजनीतिक विषयमा छलफल गर्न बैठक आह्वान गरेको हो । खतिवडाले सभापति पक्राउ गर्ने कुनै आधार नरहेको दाबी गर्दै सरकारकै तर्फबाट कांग्रेसको आवाज कमजोर बनाउन अफवाह फैलाइएको आरोप लगाए ।

‘सभापति पक्राउको आधार छैन, कांग्रेसको आवाजलाई कमजोर बनाउन सरकारले पक्राउको अफवाह फैलाएको हो । बैठकमा समसामयिक विषयमा छलफल हुनेछ’, उनले भने । सरकारले चालेका विवादित कदमबारे कांग्रेसले यसअघि नै ६ बुँदे धारणा सार्वजनिक गरिसकेको पनि उनले बताए ।

यता, कांग्रेस सहमहामन्त्री अजयबाबु शिवाकोटीले पनि सभापति पक्राउबारे फैलाइएको हल्लाको खण्डन गरेका छन् । सामाजिक सञ्जालमार्फत उनले आफू सरकारको भय र भ्रमबाट विचलित नहुने भन्दै काठमाडौँ आउँदै गरेको उल्लेख गरेका छन् ।

यसैबीच, सभापति थापालाई पक्राउ गर्न प्रहरीको केन्द्रीय अनुसन्धान ब्यूरो (सीआईबी) लाई हालसम्म कुनै आदेश प्राप्त नभएको सीआईबी प्रमुख एआईजी उमाप्रसाद चतुर्वेदीले बताएका छन् । नेपाल प्रेससँग कुरा गर्दै उनले आफू र आफ्नो कार्यालयलाई त्यस्तो कुनै निर्देशन नआएको स्पष्ट पारे ।

यद्यपि, थापाको सचिवालयले पछिल्लो दुई दिनदेखि सादा पोशाकका अपरिचित व्यक्तिहरूले निगरानी बढाएको दाबी गरेको छ । सचिवालयका एक सदस्यका अनुसार केही व्यक्तिहरू मोटरसाइकलमा थापाको पछिपछि लाग्ने गरेका छन् भने सानेपास्थित कांग्रेस केन्द्रीय कार्यालयमा पनि अपरिचित व्यक्तिको आवतजावत बढेको छ ।

प्रहरी स्रोतका अनुसार पदमुक्त हुनुअघि तत्कालीन प्रहरी महानिरीक्षक दानबहादुर कार्कीले ‘माथिको आदेश’ भन्दै काठमाडौँ उपत्यका अपराध अनुसन्धान कार्यालयलाई थापामाथि निगरानी राख्न निर्देशन दिएका थिए । तर, कार्यालय प्रमुख एसएसपी सन्तोष खड्काले बुधबार र बिहीबार सहकर्मीहरूलाई दिएको ब्रिफिङमा त्यस्तो कुनै निर्देशन उल्लेख नगरेको स्रोतको भनाइ छ । सभापति थापा पक्राउ पर्ने विषयमा चर्चा व्यापक भए पनि प्रहरीले औपचारिक रूपमा पक्राउसम्बन्धी कुनै आदेश प्राप्त भएको पुष्टि गरेको छैन ।