फोल्डेबल आईफोनको स्क्रिनमा समस्या, प्रयोगकर्ताको गुनासोपछि कम्पनीले साटिदिने

काठमाडौं । बिक्री सुरु भएको केही दिनमै स्क्रिनमा समस्या देखिएपछि एप्पलले आफ्नो फोल्डेबल स्मार्टफोन ‘आईफोन डुओ’ साटिदिने भएको छ । करिब तीन लाख रुपैयाँ मूल्य पर्ने यो फोनको स्क्रिनमा धर्सा र चिरा देखिएको भन्दै केही प्रयोगकर्ताले सामाजिक सञ्जालमार्फत गुनासो गरेका छन् ।

लामो समयदेखि प्रतीक्षा गरिएको आईफोन डुओलाई एप्पलको डिजाइनमा करिब दुई दशकयताकै ठूलो परिवर्तनका रूपमा हेरिएको छ । तर, बजारमा आएको केही दिनमै फोनको स्क्रिनमा समस्या देखिएपछि यसको गुणस्तरबारे प्रश्न उठ्न थालेका छन् ।

केही प्रयोगकर्ताले फोनको स्क्रिनको बीचमा, पट्याउने भागमा चिरा परेको जस्तो देखिने तस्बिर अनलाइनमा सार्वजनिक गरेका छन् । त्यस्तै, स्क्रिनमा धर्सा देखिएको र फोन खोल्दा चरमराउने आवाज आउने गरेको गुनासो पनि ग्राहकले गरेका छन् ।

समस्या देखिएका फोन साट्नका लागि कम्पनीसँग सम्पर्क गर्न एप्पलले ग्राहकलाई आग्रह गरेको छ । यद्यपि, स्क्रिनमा समस्या देखिनुको कारण र प्रभावित फोनको संख्याबारे विस्तृत विवरण सार्वजनिक भएको छैन ।

आईफोन डुओ गत साता विश्वभरका एप्पल स्टोरमा सार्वजनिक गरिएको थियो । नयाँ फोन खरिद गर्न ग्राहकको भीड लागेको थियो । फोल्डेबल फोन बजारमा प्रवेश गर्दै एप्पलले आफ्ना उत्पादनको लोकप्रियता थप बढाउने र यसअघि नै यो क्षेत्रमा सक्रिय प्रतिस्पर्धी कम्पनीलाई चुनौती दिने अपेक्षा गरिएको थियो । तर, सुरुवाती दिनमै देखिएका समस्याले कम्पनीको नयाँ उत्पादनमाथि थप चासो र प्रश्न सिर्जना गरेको छ ।