साइबर ठगी नियन्त्रण गर्न राष्ट्र बैंकको निर्देशन, २४सै घण्टा सम्पर्क अधिकृत तोक्नुपर्ने

काठमाडौं । अनलाइन तथा वित्तीय साइबर ठगीका घटना बढ्दै गएपछि नेपाल राष्ट्र बैंकले बैंक तथा वित्तीय संस्था र भुक्तानी सेवा प्रदायकहरूलाई २४सै घण्टा उपलब्ध हुने गरी सम्पर्क अधिकृत तोक्न निर्देशन दिएको छ ।

राष्ट्र बैंकको भुक्तानी प्रणाली विभागले सूचना जारी गर्दै विकास बैंक, वित्त कम्पनी, भुक्तानी प्रणाली सञ्चालक तथा भुक्तानी सेवा प्रदायकहरूलाई यस्तो व्यवस्था गर्न भनेको हो ।

नेपाल सरकार, गृह मन्त्रालयको निर्णयअनुसार स्वीकृत ‘एकीकृत साइबर स्क्याम प्रतिकार्य केन्द्रको स्थापना र कार्य सञ्चालनसम्बन्धी दिग्दर्शन’ कार्यान्वयनका लागि यस्तो निर्देशन दिइएको राष्ट्र बैंकले जनाएको छ । साइबर अपराध नियन्त्रण तथा अनुसन्धानमा नेपाल प्रहरीको साइबर ब्युरोसँग प्रभावकारी समन्वय र सहकार्य गर्ने उद्देश्यले सम्पर्क अधिकृत तोक्न भनिएको हो ।

उक्त केन्द्रमा वाणिज्य बैंक, ई–सेवा र खल्ती भौतिक रूपमा नै समन्वयमा रहने व्यवस्था भएकाले अन्य विकास बैंक, वित्त कम्पनी तथा भुक्तानी सेवा प्रदायकलाई सम्पर्क अधिकृत तोक्न निर्देशन दिइएको राष्ट्र बैंकले जनाएको छ ।

राष्ट्र बैंकले सम्बन्धित संस्थाहरूलाई सम्पर्क अधिकृतको नाम, थर, फोन नम्बर र कार्यालयको इमेल ठेगाना तत्काल विभागको आधिकारिक इमेलमा पठाउन भनेको छ । साइबर अपराध अनुसन्धान तथा तत्काल प्रतिकार्यका लागि ती अधिकारी २४सै घण्टा सम्पर्कमा रहनुपर्नेछ ।

डिजिटल भुक्तानीको प्रयोग बढेसँगै अनलाइन ठगी, बैंक खाता ह्याकिङ तथा अवैध रूपमा रकम स्थानान्तरण हुने घटना पनि बढिरहेका छन् । यस्ता घटनामा तत्काल अनुसन्धान र कारबाही गर्न तथा पीडितको रकम रोक्का र फिर्ता गर्ने प्रक्रियालाई सहज बनाउन प्रहरी र वित्तीय क्षेत्रबीच समन्वय संयन्त्र निर्माण गरिएको हो ।