हस्तकलामा प्रधानमन्त्री शाहको चासो, रोकिएको प्रोत्साहन रकम दिन सरकार तयार

काठमाडौं । प्रधानमन्त्री बालेन्द्र शाहले हस्तकला क्षेत्र नेपालको मौलिक कला, संस्कृति र रोजगारीसँग प्रत्यक्ष जोडिएको बताएका छन् । नेपाल हस्तकला व्यवसायी महासंघका पदाधिकारीहरुसँग बुधबार भएको छलफलमा प्रधानमन्त्री शाहले कला संरक्षण, सीप हस्तान्तरण, उत्पादन विस्तार तथा रोजगारी सिर्जनाका लागि हस्तकला क्षेत्रको उन्नयनमा सरकार प्रतिबद्ध रहेको बताए ।

निजी-सरकारी साझेदारी (पीपीपी) मोडलमा हस्तकला विकास बोर्ड गठन गर्नुपर्ने महासंघको मागमा पनि प्रधानमन्त्री शाह सकारात्मक रहेको बताइएको छ ।

प्रधानमन्त्री शाह र महासंघका पदाधिकारीबीच भएको छलफलमा महासंघका प्रतिनिधिहरुले हस्तकला क्षेत्रको विकास, विस्तार, संरक्षण तथा अन्तर्राष्ट्रिय बजार प्रवर्द्धनका लागि सरकारसँग पूर्ण सहकार्य गर्न तयार रहेको प्रतिवद्धता जनाएका छन् । 

प्रधानमन्त्री शाहले महासंघका पदाधिकारीहरुँग प्रधानमन्त्री तथा मन्त्रिपरिषद्को कार्यालयमा छलफल गरेका थिए । छलफलका क्रममा महासंघले विगतदेखि आफ्नै पहलमा मंसिर २८ गते मनाउँदै आएको हस्तकला दिवसलाई राष्ट्रिय स्तरमा मान्यता दिई औपचारिक रूपमा मनाउनुपर्ने माग गरेको थियो । प्रधानमन्त्री शाहले यस विषयमा तत्काल गृह मन्त्रालयसँग समन्वय गर्न आफ्नो टोलीलाई निर्देशन दिएको जानकारी महासंघले दिएको छ ।

हस्तकला सामग्री निर्यातमा हाल स्वघोषणाको आधारमा भइरहेको मूल्यांकन प्रणालीको सट्टा बिजक मूल्यांकनलाई अनिवार्य बनाउन सके राजस्व वृद्धि हुने महासंघको सुझावलाई सरकारले सकारात्मक रूपमा लिएको छ । साथै, हस्तकला सामग्री निर्यातकर्ताले पाउनुपर्ने पाँच प्रतिशत प्रोत्साहन रकम विगत तीन वर्षदेखि रोकिएको विषयमा प्रधानमन्त्री शाहले पुनः निरन्तरता दिने आश्वासन दिएको महासंघले जनाएको छ ।

महासंघले उद्योग विभाग परिसरमा निर्माण सम्पन्न भइसकेको सार्क हस्तकला विकास केन्द्रको भवन हस्तकला क्षेत्रकै प्रयोजनका लागि फिर्ता गरिनुपर्ने माग राखेका थिए । छलफलमा उपत्यकामा ‘हस्तकला ग्राम’ स्थापना गर्ने, सातै प्रदेशमा हस्तकला सीप प्रशिक्षण केन्द्र सञ्चालन गर्ने तथा निर्माण व्यवसायीसँग सहकार्य गरी कलात्मक संरचना निर्माण गर्ने विषयमा समेत छलफल भएको थियो । प्रधानमन्त्री शाहले यी प्रस्तावप्रति विशेष चासो देखाएको बताइएको छ।

महासंघले परम्परागत सीप तथा कलाको संरक्षण, हस्तकलाकर्मीलाई परिचयपत्र वितरण, बजार विस्तार र निर्यात प्रवर्द्धनका विषयमा समेत विभिन्न सुझाव तथा माग प्रस्तुत गरेको थियो । छलफलमा महासंघका अध्यक्ष रविन्द्र शाक्य, वरिष्ठ उपाध्यक्ष राजमान बज्राचार्य, उपाध्यक्ष किरणकुमार स्थापित, सल्लाहकार विकासरत्न ढाक्वा तथा वरिष्ठ निर्यातकर्ता महेश्वर श्रेष्ठलगायत सहभागी थिए ।