नेपालगञ्ज-पोखरा उडान भदौ ३१ देखि पुनः सुरु हुँदै

काठमाडौं । नेपालगञ्ज-पोखरा नियमित हवाई सेवा आगामी भदौ ३१ गतेदेखि पुनः सञ्चालनमा आउने भएको छ। बुद्ध एयरले यात्रुको माग बढेपछि केही समयदेखि स्थगित रहेको यो रुटमा फेरि उडान थाल्ने तयारी गरेको हो ।

बुद्ध एयर नेपालगञ्जका प्रमुख विनीतविक्रम शाहका अनुसार पछिल्लो समय पोखरा जाने यात्रु तथा भारतको उत्तर प्रदेशबाट आउने धार्मिक पर्यटकको चहलपहल बढेकाले सेवा पुनः सुरु गर्न लागिएको हो । यसअघि यात्रुको कमी र सञ्चालन खर्च बढेपछि गत जेठ ५ गतेदेखि उडान रोकिएको थियो ।

पुनः सञ्चालन हुने उडान सातामा तीन दिन हुने बताइएको छ। बुद्ध एयरका अनुसार आइतबार, बुधबार र शुक्रबार नेपालगञ्ज-पोखरा उडान हुनेछ र टिकट बुकिङसमेत खुला गरिएको छ । उडान पुनः सुरु हुने खबरसँगै बाँकेका पर्यटन व्यवसायी उत्साहित भएका छन् । पर्यटन प्रवर्द्धन मञ्च बाँकेका अध्यक्ष कृष्णप्रसाद श्रेष्ठले यो सेवाले पश्चिम नेपालका साथै भारतका पर्यटकलाई पोखरासँग प्रत्यक्ष जोड्न महत्वपूर्ण भूमिका खेल्ने बताए ।

उनका अनुसार हवाई सेवा नियमित भएपछि पोखरा, मुस्ताङलगायतका पर्यटकीय गन्तव्यमा पुग्ने पश्चिम नेपालका यात्रुलाई सहज हुनेछ । त्यस्तै पोखरा क्षेत्रबाट नेपालगञ्ज हुँदै बागेश्वरी मन्दिर तथा भारतको अयोध्यासहितका धार्मिकस्थल भ्रमण गर्न चाहने पर्यटकलाई पनि सुविधा पुग्ने अपेक्षा गरिएको छ ।

स्थानीय पर्यटन व्यवसायीको पहलपछि नेपालगञ्ज-पोखरा उडान पहिलोपटक २०७८ साल साउन १७ गतेदेखि सातामा तीन दिन सञ्चालनमा आएको थियो। सेवा पुनः सुरु भएपछि पश्चिम नेपाल र पोखराबीचको पर्यटन तथा यात्रु आवागमन थप चलायमान हुने व्यवसायीहरूको विश्वास छ ।