चीनले नेपाललाई २० लाख अमेरिकी डलर सहयोग गर्ने
.jpg)
चीनको आर्थिक, मानवीय तथा प्राविधिक सहयोगले विपद्को कठिन परिस्थितिमा नेपाललाई थप सहयोग पुग्ने विश्वास सरकारको रहेको छ ।
काठमाडौं । चीन सरकारले नेपाललाई २० लाख अमेरिकी डलर नगद सहयोग उपलब्ध गराउने भएको छ । हालैको विनाशकारी बाढी तथा विपद्बाट प्रभावित क्षेत्रमा राहत, उद्धार र पुनःस्थापनाका कार्यलाई सहयोग पुर्याउने उद्देश्यले चीनले उक्त आर्थिक सहायता गर्न लागेको हो ।
परराष्ट्रमन्त्री शिशिर खनालका अनुसार चीनले नगद सहयोगसँगै राहत सामग्री बोकेका दुईवटा कार्गो विमान पनि नेपाल पठाउने तयारी गरेको छ । ती विमानमार्फत विपद्प्रभावित नागरिकका लागि आवश्यक राहत सामग्री नेपाल ल्याइने बताइएको छ ।
विपद्का कारण विभिन्न जिल्लामा जनधन तथा भौतिक संरचनामा ठूलो क्षति पुगेको अवस्थामा नेपाल सरकारले अन्तर्राष्ट्रिय समुदायसँग आवश्यक प्राविधिक सहयोगका लागि आग्रह गर्दै आएको छ । विशेषगरी सुरुङ उद्धार, क्षतिग्रस्त पूर्वाधारको पुनःस्थापना, शवको पहिचान तथा अन्य प्राविधिक क्षेत्रमा नेपाललाई बाह्य विशेषज्ञताको आवश्यकता रहेको सरकारको भनाइ छ ।
चीनबाट आउने सहयोगले प्रभावित क्षेत्रमा जारी राहत तथा उद्धार कार्यलाई थप प्रभावकारी बनाउन सहयोग पुग्ने अपेक्षा गरिएको छ । चीनले सुरुङ उद्धारका लागि विशेषज्ञ सहयोग उपलब्ध गराउने विषयमा पनि पहल गरेको अन्तर्राष्ट्रिय सञ्चारमाध्यमहरूले जनाएका छन् । सरकारले प्रभावित नागरिकको उद्धार, राहत वितरण र पुनःस्थापनालाई प्राथमिकतामा राखेर काम गरिरहेको जनाएको छ ।
विपद्पछि मित्रराष्ट्र तथा अन्तर्राष्ट्रिय समुदायबाट प्राप्त सहयोगलाई प्रभावकारी रूपमा परिचालन गर्ने तयारीसमेत भइरहेको छ । चीनको आर्थिक, मानवीय तथा प्राविधिक सहयोगले विपद्को कठिन परिस्थितिमा नेपाललाई थप सहयोग पुग्ने विश्वास सरकारको रहेको छ ।
सम्बन्धित खबर
