एनसेलका सीईओ माइकलले दिए राजीनामा, डिल्लीराम श्रेष्ठ अन्तरिम सीईओ

काठमाडौं ।  नेपालको एक प्रमुख बहुराष्ट्रिय कम्पनी एनसेलका सीईओ माइकल फोलेले आफ्नो पदबाट राजीनामा दिएका छन् । नियुक्ति लिएको १० महिना पनि नपुग्दै फोलेले राजीनामा दिएका हुन् । 

पारिवारिक कारण देखाएर सीईओ फोलेले राजीनामा दिएको र ९ भदौमा स्वीकृतिसमेत भएको एनसेलले पुष्टि गरेको छ । यसबारे नेपाल दूरसञ्चार प्राधिकरणमा जानकारी गराइसकिएको एनलसेलले जनाएको छ ।

नयाँ सीईओ नियुक्त नभएसम्मका लागि कम्पनीका प्रमुख कर्पोरेट तथा नियामकीय मामिला अधिकृत डिल्लीराम श्रेष्ठलाई ‘लिमिट्स अफ अथोरिटी’ सहित अन्तरिम सीईओको जिम्मेवारी सुम्पिएको छ ।

 एनसेलको २५ वर्षे अनुमतिपत्रको अवधि सकिन अब करिब तीन वर्ष मात्रै बाँकी छ । यही अवस्थामा दूरसञ्चार प्राधिकरणले पूर्वस्वीकृति नलिई कम्पनीका जग्गा, भवन, उपकरण तथा बीटीएस टावरलगायत सम्पत्ति बिक्री, हस्तान्तरण वा धितो राख्न रोक लगाएपछि कम्पनीमाथि थप नियामकीय दबाब बढेको छ ।

फोले नेपाल आउँदा उच्च गतिको ५जी सेवा विस्तार, घरघरमा फाइबर इन्टरनेट पुर्‍याउने तथा आधुनिक डाटा सेन्टर निर्माणजस्ता योजनालाई अघि बढाउने लक्ष्यमा थिए । सरकारले अनुकूल वातावरण बनाइदिए नेपालमा करिब २५ करोड अमेरिकी डलर थप लगानी गर्ने योजना पनि उनले अघि सारेका थिए ।

तर, अनुमतिपत्रको भविष्य, सम्पत्तिमाथिको नियामकीय नियन्त्रण, कानुनी विवाद तथा सरकारी नीतिको अनिश्चितताका कारण प्रस्तावित लगानी कार्यान्वयनमा चुनौती थपिएको देखिन्छ । निजी क्षेत्र र विदेशी लगानीकर्ताले लामो समयदेखि लगानीको सुरक्षा, नीतिगत स्थिरता र स्पष्ट नियमनको माग गर्दै आएका छन् । एनसेलको पछिल्लो घटनाक्रमले ती विषयलाई पुनः बहसको केन्द्रमा ल्याएको छ ।

यसबीच स्मार्ट टेलिकमको सम्पत्ति खरिद-बिक्रीसँग सम्बन्धित प्रकरणमा एनसेल तथा नेपाल इन्भेष्टमेन्ट मेगा बैंकका उच्च अधिकारीसमेत कानुनी विवादमा तानिएपछि एनसेल व्यवस्थापनमाथि थप दबाब परेको थियो । विदेशी लगानीसँग जोडिएका व्यावसायिक निर्णयहरू नै कानुनी अनुसन्धान र विवादको विषय बन्न थालेपछि लगानीकर्ताको जोखिम मूल्यांकनमा समेत त्यसको प्रभाव पर्न सक्ने देखिन्छ ।