आजदेखि अमेरिका निर्यात हुने भारतीय सामानमा ५० प्रतिशतसम्म कर, रोजगारी कटौति–सेयर बजारमा हलचल

अमेरिकाले मंगलबार भारतमा थप २५ प्रतिशत कर लगाउने आधिकारिक सूचना जारी गरेपछि भारतमा हलचल मच्चिएको छ । भारतीय समय अनुसार आज बुधबार अर्थात् अगस्ट २७ को बिहान ९ः३१ बजे देखी लागु हुने करसँगै अमेरिका निर्यात हुने सामानमा कुल कर ५० प्रतिशत पुगेको छ । 

अमेरिकी राष्ट्रपति डोनाल्ड ट्रम्पले अगस्ट ६ मा रूसबाट तेल खरिद गरेबापत जरिवानाको रूपमा थप घोषणा गरेको थिए । त्यसअघि नै अगस्ट ७ देखि लागू हुनेगरि अमेरिका निर्यात हुने भारतीय सामानमा २५ प्रतिशत कर लगाइएको थियो ।

मंगलबार जारी आदेशमा भनिएको छ,– ‘यस कागजातको सूचीमा उल्लेख गरिएको शुल्क भारतबाट आउने सामानहरूमा लागु हुनेछ । यी सामानहरू या त प्रयोगको लागि अमेरिका ल्याइनेछ वा प्रयोगको लागि गोदामबाट बाहिर निकालिनेछ ।’

थपिएको करले यसअघि अप्ठ्यारोमा परेका उद्योगहरुमा थप संकट पैदा गर्नेछ । ट्रम्पको करले गहना, कपडा, अटो, समुद्री खाना क्षेत्रका उद्योगहरूको नाफा घटाउन सक्छ । अमेरिकासँग नयाँ व्यापार सम्झौता भएन वा कर घटाइएन भने ४८.२ अर्ब अमेरिकी डलरको निर्यातमा प्रत्यक्ष प्रभाव पर्ने विज्ञहरुले जनाएका छन् । तर, अमेरिकी करले सूचना प्रविधि, औषधि र विद्युतीय उद्योगहरुलाई भने कुनै असर गर्ने छैन । ट्रम्पले रूसी सामान आयात बन्द नगरेमा आगामी दिनमा थप क्षेत्रमा कर लगउने उद्घोष गरेका छन् ।

चीन पछि भारत रूसी तेलको सबैभन्दा ठूलो खरिदकर्ता हो । युक्रेन युद्ध अघि भारतले रूसबाट केवल ०.२ प्रतिशत (प्रतिदिन ६८ हजार ब्यारेल) तेल आयात गर्ने गरेकोमा मे २०२३ सम्ममा यो बढेर ४५ प्रतिशत (प्रतिदिन २० लाख ब्यारेल) पुगेको छ थियो । २०२५ को जनवरी देखि जुलाईसम्म मात्रै भारतले रूसबाट हरेक दिन १७.८ लाख ब्यारेल तेल खरिद गरिसकेको छ । पछिल्ला दुई वर्षदेखि भारतले हरेक वर्ष १३० अर्ब डलर (११.३३ लाख करोड भारतीय रुपैयाँ) भन्दा बढी मूल्यको रूसी तेल खरिद गर्दै आएको छ ।

भारतले अमेरिकामा सबैभन्दा धेरै गहना, कपडा, मेसिनरी र रसायन निर्यात गर्छ । ५० प्रतिशत करले अमेरिकामा यी चीजहरू महँगो बनाउँदा त्यसको अर्डरहरू घट्न गई उद्योगहरु धरासायी हुन सक्ने बताइएको छ । उद्योगहरु बन्द भएमा रोजगारी गुम्ने जोखिम रहन्छ र यसले अन्ततः सरकारी आम्दानी (राजस्व) मै प्रभाव पर्नेछ । 

अमेरिकाले भारतीय उत्पादनमाथि ५० प्रतिशत कर लगाउने नीति लागु गरेसँगै भारतीय सेयर बजारमा हलचल मच्चिएको छ । ५० प्रतिशत कर लागू हुने अघिल्लो दिन मंगलबार भारतको सेयर बजारमा ठूलो गिरावट आएको छ ।

भारतीय सेयर बजारको सूचंकाकहरुमध्ये स्टक एक्सचेन्ज सेन्सेटिभ इण्डेक्स (सेन्सेक्स) ८४९.३७ अंकले घटेर ८०७८६.५४ मा बन्द भएको छ भने अर्काे स्टक सूचकांक नेशनल स्टक एक्सचेन्ज फिप्टी (नेप्टी) २५५.७० अंक घटेर २४७१३.०५ विन्दुमा बन्द भएको छ ।

यद्यपी बुधबार (आज) गणेश चतुर्थीका कारण भारतीय सेयर बजार बन्द हुने भएकाले अमेरिकी करको असर कस्तो पर्छ भनेर हेर्न बिहीवारसम्म कुर्नुपर्ने हुन्छ । तर, अमेरिकी करको विषयलाई लिएर भारतीय लगानीकर्ताहरु शसंकित देखिएका छन् ।