फेसबुक, टिकटकमार्फत व्यापार गर्नेलाई सूचीकृत हुन सरकारको निर्देशन, नभए कारबाही हुने

काठमाडौं । फेसबुक, टिकटक, इन्स्टाग्रामलगायत सामाजिक सञ्जाल तथा विभिन्न एप र वेबसाइटमार्फत व्यापार व्यवसाय सञ्चालन गर्दै आएका व्यवसायीहरू अब अनिवार्य रूपमा वाणिज्य, आपूर्ति तथा उपभोक्ता संरक्षण विभागमा सूचीकृत हुनुपर्ने भएको छ ।

विभागले जरुरी सूचना जारी गर्दै प्रचलित कानुनअनुसार सूचीकृत नभई ई–कमर्स व्यवसाय सञ्चालन गरेको पाइएमा कानुनी कारबाही गर्ने चेतावनी दिएको छ ।

विभागका अनुसार वेबसाइट, मोबाइल एप, सफ्टवेयर, इन्टरनेट, इन्ट्रानेट वा सामाजिक सञ्जालको ‘मार्केटप्लेस’ प्रयोग गरी वस्तु वा सेवा बिक्री गर्ने सबै व्यवसायी ई–कमर्सको दायरामा पर्छन् । वस्तु बिक्री गर्ने व्यवसायी मात्र नभई विद्युत्, खानेपानी, टेलिफोन, सूचना प्रविधि, स्वास्थ्य, शिक्षा, परामर्श, ढुवानी, पर्यटन, मनोरञ्जन, यातायात, बैंकिङ, बिमा तथा कानुनी र इन्जिनियरिङ सेवा प्रदान गर्नेहरू पनि यसमा समेटिन्छन् ।

पछिल्लो समय अनलाइन माध्यमबाट हुने कारोबारमा उपभोक्तालाई भ्रममा पार्ने, ठगी गर्ने तथा गुणस्तरहीन वस्तु तथा सेवा बिक्री गर्ने गुनासो बढ्दै गएपछि विभागले यस्तो व्यवस्था कडाइका साथ लागू गर्न लागेको जनाएको छ ।

विभागले सूचनाको बेवास्ता गरी सूचीकृत नभएका वा गैरकानुनी विद्युतीय प्लेटफर्ममार्फत व्यवसाय सञ्चालन गरेको भेटिएमा ई–कमर्स ऐन, २०८१ तथा अन्य प्रचलित कानुनबमोजिम कारबाही गर्ने स्पष्ट पारेको छ ।

त्यस्तै, विभागले उपभोक्तालाई पनि अनलाइनबाट वस्तु वा सेवा खरिद गर्दा आधिकारिक तथा सूचीकृत पोर्टलबाट मात्र कारोबार गर्न आग्रह गरेको छ ।