काठमाडौंका केही एटीएमबाट १०० रुपैयाँका नोट निस्किन थाले

काठमाडौं । चाडपर्वको समयमा साना दरका नोटका लागि बैंक काउन्टरमा हुने भीड घटाउने उद्देश्यले बैंक तथा वित्तीय संस्थाले एटीएममार्फत १०० रुपैयाँका नोट उपलब्ध गराउन थालेका छन् । नेपाल राष्ट्र बैंकको आग्रहपछि केही बैंकले एटीएम मेसिनको प्राविधिक व्यवस्थापन गरी १०० रुपैयाँका नोट राख्न थालेका हुन् ।

यसअघि अधिकांश एटीएमबाट ५०० र १ हजार रुपैयाँका नोट मात्र निकाल्न मिल्ने व्यवस्था थियो। तर, दसैंलगायतका चाडपर्वलाई लक्षित गर्दै सर्वसाधारण तथा विद्यार्थीको सहजताका लागि १०० रुपैयाँका नोटसमेत एटीएमबाट उपलब्ध गराउने व्यवस्था सुरु गरिएको हो ।

नेपाल राष्ट्र बैंकका कार्यकारी निर्देशक तथा मुद्रा व्यवस्थापन विभागका प्रमुख अनुज दाहालका अनुसार काठमाडौं उपत्यकाका केही प्रमुख स्थानमा यो सुविधा सञ्चालनमा आइसकेको छ । सिंहदरबार, न्युरोडलगायतका स्थानमा रहेका केही एटीएमबाट १०० रुपैयाँका नोट निकाल्न सकिने व्यवस्था मिलाइएको उनले जानकारी दिए ।

बैंकहरूले आफ्ना कुल एटीएममध्ये करिब १५ देखि २५ प्रतिशत मेसिनमा १०० रुपैयाँका नोट राख्न सकिने जानकारी राष्ट्र बैंकलाई दिएका छन् । राष्ट्र बैंकले पनि बैंक तथा वित्तीय संस्थालाई यस्तो व्यवस्था गर्न आग्रह गर्दै नेपाल बैंकर्स संघलाई पत्राचार गरेको थियो ।

चाडपर्वका बेला साना दरका नोट साट्न बैंकका काउन्टरमा लामो लाइन लाग्ने समस्या कम गर्न एटीएमबाटै १०० रुपैयाँका नोट उपलब्ध गराउने व्यवस्था गरिएको हो । यसबाट कम रकम आवश्यक पर्ने विद्यार्थी, न्यून आय भएका नागरिक तथा खुद्रा रकम चाहिने सर्वसाधारणलाई सहज हुने अपेक्षा गरिएको छ ।

तर, सबै एटीएमबाट तत्काल १०० रुपैयाँका नोट निकाल्न भने सम्भव छैन । पुराना मोडलका अधिकांश एटीएममा दुईवटा मात्र क्यासेट हुने भएकाले त्यहाँ १ हजार र ५०० रुपैयाँका नोट राखिँदै आएको छ । थप क्यासेट नभएकाले १०० रुपैयाँका नोट राख्न प्राविधिक समस्या हुने बैंकहरूको भनाइ छ ।

नयाँ प्रविधिका एटीएममा भने तीनदेखि चारवटासम्म क्यासेट हुने भएकाले अतिरिक्त क्यासेटमा १०० रुपैयाँका नोट राख्न सकिन्छ । हाल सञ्चालनमा रहेका एटीएममध्ये करिब २५ प्रतिशत नयाँ प्रविधिका भएकाले यस्ता मेसिनबाट प्राथमिकताका आधारमा १०० रुपैयाँका नोट उपलब्ध गराउन सकिने बैंकरहरूले बताएका छन् ।

राष्ट्र बैंकको यो व्यवस्थाले दसैं, तिहार र छठजस्ता चाडपर्वमा साना दरका नोटका लागि बैंक काउन्टरमा हुने चाप घटाउनुका साथै डिजिटल माध्यमबाटै आवश्यक रकम निकाल्न सर्वसाधारणलाई थप सुविधा पुग्ने अपेक्षा गरिएको छ ।