स्वास्थ्य बीमा बोर्डद्वारा मङ्सिरसम्मको २३ अर्ब ४४ करोड रुपैयाँ बक्यौता भुक्तानी

काठमाडौँ ।  स्वास्थ्य बीमा बोर्डले सेवा प्रदायक स्वास्थ्य संस्थालाई चालु आर्थिक वर्षको मङ्सिरसम्मको बक्यौता रकम भुक्तानी गरेको छ ।

बोर्डले आज जारी गरेको विज्ञप्तिअनुसार सेवा प्रदायक स्वास्थ्य संस्थाहरूलाई बक्यौताबापत उपलब्ध गराउनुपर्ने रु २३ अर्ब ४४ करोड दुई लाख ९८ हजार १५ भुक्तानी गरिएको हो । बोर्डका अनुसार स्वास्थ्य बीमा कार्यक्रममा आबद्ध सबै सेवा प्रदायक संस्थाको गत मङ्सिर महिनासम्मको दाबी बक्यौता फरफारक गरिएको छ ।

गत पुस महिनापछिको दाबी भुक्तानीका लागि आवश्यक बजेट व्यवस्थापन तथा दिगो वित्तीय स्रोत सुनिश्चित गर्न सम्बन्धित निकायसँग निरन्तर समन्वय भइरहेको बोर्डले जनाएको छ । बोर्डले सेवा प्रदायक स्वास्थ्य संस्थालाई बीमित सेवाग्राहीको उपचार सेवामा कुनै अवरोध नगरी निर्धारित मापदण्डअनुसार गुणस्तरीय सेवा उपलब्ध गराउन निर्देशन दिएको छ ।

त्यसैगरी बीमित सेवाग्राहीलाई उपलब्ध सेवाको जिम्मेवारीपूर्वक उपयोग गर्न र अनावश्यक परीक्षण तथा सेवा माग नगर्न अनुरोध गरिएको छ ।

चिकित्सक तथा स्वास्थ्यकर्मीलाई पनि आवश्यकताभन्दा बढी परीक्षण वा उपचारका लागि दबाब नदिन तथा स्वास्थ्य बीमा कार्यक्रमको दिगोपना र प्रभावकारिता कायम राख्न सहयोग गर्न बोर्डले आह्वान गरेको छ ।