करदाता प्रोत्साहन कार्यक्रमः साउनको दोस्रो पाक्षिक विजेता घोषणा, अर्थमन्त्रीद्वारा सचेत उपभोक्ताको ‘दूत’ बन्न आग्रह

काठमाडौं । आन्तरिक राजश्व विभागद्वारा सञ्चालित ‘करदाता प्रोत्साहन पुरस्कार’ अन्तर्गत साउन महिनाको दोस्रो पाक्षिक विजेताहरूको नाम घोषणा गरिएको छ । 

अर्थ मन्त्रालयमा आयोजित एक कार्यक्रमका बीच अर्थमन्त्री डा.स्वर्णिम वाग्लेले साउनको दोस्रो पाक्षिकका १७ जना विजेताहरूमध्ये १६ जना (जनही १ लाख रुपैयाँका विजेता)को नाम सार्वजनिक गरे ।

त्यसैगरी, १० लाख रुपैयाँ राशिको बम्पर पुरस्कारको घोषणा भने साउनको पहिलो पाक्षिकका बम्पर विजेता हेमराज जोशी र उनकी धर्मपत्नी तुलसी पन्तले गरेका छन् । कार्यक्रममा पहिलो पाक्षिकका अर्का विजेता हिमाल अर्यालको पनि उपस्थिति रहेको छ । 

कार्यक्रमलाई सम्बोधन गर्दै अर्थमन्त्री डा.वाग्लेले ‘बिल लिने र बिल दिने’ संस्कृतिको प्रवद्र्धनका लागि यो कार्यक्रम ल्याइएको स्पष्ट पारे ।  विजेताहरूलाई बधाई दिँदै अर्थमन्त्रीले उनीहरूलाई ‘सचेत उपभोक्ता अभियान’ को विशेष दूतको रूपमा काम गर्न आग्रह गरे । 

पुरस्कार घोषणा कार्यक्रममा सुदूरपश्चिमदेखि गैँडाकोटसम्मका विजेताहरूको सहभागिता रहेको थियो । अर्थमन्त्रीले दोस्रो संस्करणमा पुरस्कृत हुने सम्पूर्ण उपभोक्ताहरूलाई बधाई दिँदै आगामी दिनमा पनि यस्ता कार्यक्रमले निरन्तरता पाउने संकेत गरे ।