एनआईएमबी बैंकका अध्यक्ष पृथ्वीबहादुर पाँडे ४० लाख धरौटीमा रिहा

काठमाडौं । नेपाल इन्भेष्टमेन्ट मेगा बैंक (एनआईएमबी) का अध्यक्ष पृथ्वीबहादुर पाँडे धरौटीमा रिहा भएका छन् । सोमबार काठमाडौं जिल्ला अदालतमा भएको थुनछेक बहसपछि न्यायाधीश नवराज दुलालको इजलासले पाँडेलाई ४० लाख रुपैयाँ धरौटीमा छाड्न आदेश दिएको हो ।

पाँडेविरुद्ध गत साउन २७ गते ठगी, संगठित अपराध र बैंक तथा वित्तीय संस्थासम्बन्धी कसुरमा मुद्दा दर्ता गरिएको थियो । अदालतले मागेको धरौटी रकम बुझाएपछि उनी सोमबार नै रिहा भएका छन् ।

पाण्डेलाई राज्यको स्वामित्वमा गइसकेको स्मार्ट सेलको सम्पत्ति बेचेको आरोपमा प्रहरीको केन्द्रीय अनुसन्धान व्यूरो (सीआईबी)ले अनुसन्धान गरेको प्रतिवेदनमा आधारमा सरकारी वकीलको कार्यालयले मुद्दा दर्ता गराएको थियो ।

यसअघि एनआईएमबी बैंकका प्रमुख कार्यकारी अधिकृत ज्योति प्रकाश पाण्डे ८० लाख धरौटीमा रिहा भएका थिए ।