स्वस्तिक लघुवित्तको आईपीओ बिक्री खुल्यो, भदौ ३ गतेसम्म आवेदन दिन पाइने

काठमाडौं। स्वस्तिक लघुवित्त वित्तीय संस्थाले आजदेखि सर्वसाधारणका लागि आईपीओ बिक्री खुलाएको छ । कम्पनीले पहिलो चरणमा विदेश रोजगारीमा कार्यरत नेपालीलाई आईपीओ बिक्री गरेपछि दोस्रो चरणमा सर्वसाधारणलाई निष्कासन गरेको हो ।

स्वस्तिक लघुवित्तको आइपीओ नै लघुवित्त तर्फको आइपीओ हो । आगामी दिनमा नेपाल राष्ट्र बैंकले नयाँ लघुवित्त खोल्न स्वीकृती दिएमा मात्रै थप लघुवित्तको आइपीओ जारी हुनेछ । अन्यथा स्वस्तिक नै अन्तिम हुने छ । 

कम्पनीले प्रतिकित्ता १०० रुपैयाँका दरले २ लाख ३१ हजार कित्ता आईपीओ बिक्री गर्न नेपाल धितोपत्र बोर्डबाट अनुमति पाएको छ ।

कम्पनीले असार २७ देखि साउन ९ सम्म वैदेशिक रोजगारीमा रहेका नेपालीलाई कुल २३ हजार १०० कित्ता आईपीओ निष्कासन गरेको थियो । आवेदन दिएका २ हजार ३१० जनालाई गत साउन १६ मा १० कित्ताका दरले आईपीओ बाँडफाँट गरिसकेको छ ।

कम्पनीले २ लाख ७ हजार ९०० कित्तामध्ये १ हजार १५५ कित्ता कार्यरत कर्मचारीलाई र ११ हजार ५५० कित्ता सामूहिक लगानी कोषलाई सुरक्षित गरी बाँकी रहेको १ लाख ९५ हजार १९५ कित्ता सर्वसाधारणलाई बिक्री खुलाएको हो ।

कम्पनीको आईपीओ १० देखि बढीमा ५ हजार कित्तासम्म आवेदन दिन सकिनेछ। कम्तीमा १ हजार र बढीमा ५ लाख रुपैयाँ लाग्नेछ। आवेदन दिने अन्तिम मिति भदौ ३ सम्म रहेको छ ।

कम्पनीको आईपीओलाई ईक्रा नेपालले ‘इक्राएनपी–आईआर बी एटदरेट’ रेटिङ दिएको छ, जसले समयमै वित्तीय दायित्व पूरा गर्ने क्षमतामा उच्च जोखिम रहेको संकेत गर्छ। कम्पनीको आईपीओ बिक्री प्रबन्धकमा नबिल इन्भेष्टमेन्ट बैंकिङ रहेको छ ।