२७ खर्ब विदेशी मुद्रा सञ्चितिले १८ महिनाको आयात धान्ने, दोब्बरले बढ्यो खुद बैदेशिक सम्पत्ति

काठमाडौं । नेपालको विदेशी मुद्रा सञ्चिति २०८२ असारमा २६ खर्ब ७७ अर्ब ६८ करोड रुपैयाँ पुगेको छ । यो सञ्चिति २०८१ असारको २० खर्ब ४१ अर्ब १० करोडको तुलनामा ३१.२ प्रतिशतले बढी हो ।

नेपाल राष्ट्र बैंकसँग २४ खर्ब १४ अर्ब ६४ करोड रुपैयाँ पुगेको छ भने  बैंक तथा वित्तीय संस्था (नेपाल राष्ट्र बैंकबाहेक) मा २ खर्ब ६३ अर्ब ४ करोड रुपैयाँ छ । २०८१ असारमा राष्ट्र बैंकसँग १८ खर्ब ४८ अर्ब ५५ करोड र बैंक तथा वित्तीय संस्थासँग १ खर्ब ९२ अर्ब ५५ करोड थियो ।

नेपाल राष्ट्र बैंकले आइतबार सार्वजनिक देशको वर्तमान आर्थिक तथा वित्तीय स्थिति अनुसार कुल विदेशी विनिमय सञ्चितिमा भारतीय मुद्राको अंश २३.१ प्रतिशत छ ।

आर्थिक वर्ष २०८१/८२ को आयातलाई आधार मान्दा बैंकिङ क्षेत्रसँग रहेको विदेशी विनिमय सञ्चितिले १८.२ महिनाको वस्तु आयात र १५.४ महिनाको वस्तु तथा सेवा आयात धान्न पर्याप्त छ । 

२०८२ असारमा मुलुकको वैदेशिक सम्पत्ति २९ खर्ब २९ अर्ब ६९ करोड रुपैयाँ पुगेको छ भने दायित्व २१ खर्ब ४६ अर्ब ४३ करोड रुपैयाँ छ । फलस्वरूप खुद वैदेशिक सम्पत्ति र दायित्वको स्थिति ७ खर्ब ८३ अर्ब २६ करोड रुपैयाँले बचतमा छ । जवकी २०८१ असारमा खुद वैदेशिक सम्पत्ति र दायित्वबीचको अन्तर ३ खर्ब ५ अर्ब ८४ करोड बचतमा थियो ।