अध्यागमन विभागमा ‘डिजिटल टाइम कार्ड’ लागू, अब अनलाइनबाटै आवेदन ट्रयाक गर्न सकिने

काठमाडौं । अध्यागमन विभागले ‘डिजिटल टाइम कार्ड’ कार्यान्वयनमा ल्याएको छ ।  सार्वजनिक सेवाका प्रक्रियालाई डिजिटल, ट्र्याकिङ योग्य तथा पारदर्शी बनाउने उद्देश्यले कार्यान्वयनमा ल्याइएको ‘डिजिटल टाइम कार्ड’सेवाको बिहीवार एक कार्यक्रमकाबीच शुभारम्भ गरिएको हो । सरकारले गत १३ चैतमा सार्वजनिक गरेको १०० बुँदे शासकीय सुधार सम्बन्धी घोषणाअनुसार सञ्चालनमा ल्याइएको विभागले जनाएको छ । शुभारम्भ कार्यक्रममा बोल्दै अध्यागमन विभागका महानिर्देशक रामचन्द्र तिवारीले सेवाग्राहीको आवेदनको रियल टाइममा जाँच कार्य सम्पन्न हुने लाग्ने अनुमानित समय लगायतारे जानकारी दिन रियल टाइम कार्ड लागू गरिएको बताए । अब कुनैपनि नागरिकले आफूले लिन चाहेको सेवाबारे जानकारी लिन कार्यालय धाउनुपर्ने अवस्थाको अन्त्य हुने समेत उनले दाबी गर्दै टाइम कार्ड लागू भएसँगै विभागमा कार्यरत कर्मचारीको जिम्मेवारी र जवाफदेहिता थप सुदृढ हुने विश्वास व्यक्त गरे ।  विभागका प्रत्येक शाखाका प्रतिक्षालयमा राखिएको क्यूआर स्क्यान गरेर आफ्नो आवेदन ट्रयाक गर्न सकिने समेत उनले जानकारी दिए ।

प्रणालीअन्तर्गत आवेदन प्रक्रिया ‘सेवाग्राही’, ‘सनाखत’, ‘भौचर जारी’, ‘भुक्तानी जाँच’, ‘भिसा प्रिन्ट’ र ‘सेवा सम्पन्न’ चरणमा विभाजन गरिएको छ । प्रत्येक चरणमा स्वचालित रूपमा ‘टाइम स्ट्याम्प’ अभिलेखीकरण हुने र त्यसको विवरण डिजिटल टाइम कार्डमा देखिने विभागले जनाएको छ । विभागले ‘इलेक्ट्रोनिक ट्राभल अथोराइजेसन’ (इटीए), ट्रेकिङ परमिट तथा संस्थागत आवेदनबाहेकका सेवामा सेवाग्राही विभागमा उपस्थित भएर सनाखत तथा कागजात पेस गरेपछि मात्रै डिजिटल टाइम कार्ड सुरु हुने स्पष्ट पारेको छ । राजस्व व्यवस्थापन सूचना प्रणाली, नेपालीपोर्ट वा बैंकिङ प्रणालीमा प्राविधिक समस्या आएमा सेवा प्रभावित हुन सक्ने विभागले जनाएको छ ।