माछापुच्छ्रे बैंकले सुरु गर्‍यो नेपाल–भारत ‘रियल–टाइम सीमापार रकम स्थानान्तरण’ सेवा

काठमाडौं । माछापुच्छ्रे बैंकले आफ्नो मोबाइल बैंकिङ एप्लिकेसन MBL M–Smart मार्फत नेपाल–भारत-नेपाल वास्तविक समयमै हुने सीमापार रकम स्थानान्तरण ‘Real-Time Cross Border Transfer’ सेवा सञ्चालनमा ल्याएको छ ।

यस सेवाले नेपाल र भारतबीच सुरक्षित, सहज तरिकाले तत्काल व्यक्ति–देखि–व्यक्ति रकम स्थानान्तरण (ट्रान्सफर) को सुविधा प्रदान गरी दुई छिमेकी मुलुकबीचको डिजिटल वित्तीय पहुँचलाई थप सुदृढ बनाउने अपेक्षा बैंकले गरेको छ ।

बैंकका अनुसार यस सेवा उपयोग गरी भारतमा बसोबास गर्ने, अध्ययन गर्ने तथा काम गर्ने नेपाली नागरिकहरूले भारतमा उपलब्ध UPI संग संबन्धित डिजिटल भुक्तानी एप्लिकेसनहरूको प्रयोग गरी नेपालस्थित आफ्ना परिवारजन वा अन्य लाभग्राहीहरूको सहज रुपमा बैंक खातामा रकम पठाउन सक्नेछन् । र उक्त रकम लाभग्राहीको खातामा त्तकालै जम्मा हुने भएकाले छिटो, सुरक्षित र भरपर्दो रेमिट्यान्स सेवा उपलब्ध हुनेछ ।

त्यसैगरी, नेपालमा बसोबास गर्ने वा नेपालमा कार्यरत भारतीय नागरिकहरूले पनि MBL M–Smart बचत एप्लिकेसनमा उपलब्ध Cross Border Transfer सुविधाको प्रयोग गरी भारतमा रकम पठाउन सक्नेछन् ।

माछापुच्छ्रे बैंकले यो सेवा सञ्चालन गर्दा सुरक्षा, पारदर्शिता तथा नियामकीय अनुपालनका उच्चतम मापदण्डहरूलाई पालनमा उच्च प्राथमिकता दिएको छ । यो पहलले नेपाल र भारतबीचको डिजिटल भुक्तानी तथा रेमिट्यान्स प्रणालीलाई थप प्रवर्द्धन गर्नुका साथै ग्राहकहरूलाई आधुनिक, सुरक्षित र सुविधाजनक बैंकिङ सेवा प्रदान गर्ने विश्वास लिईएको छ ।