मितेरी डेभलपमेन्ट बैंककाे लाभांश क्षमता १२.८३ प्रतिशत

मितेरी डेभलपमेन्ट बैंकले गत आर्थिक वर्षको चौथो त्रैमासमा खराब कर्जा उल्लेख्य घटाएको छ। आज प्रकाशित चौथो त्रैमासको विवरणमा खराब कर्जा उल्लेख्य घटेको देखिएको हो।

बैंकको अघिल्लो आर्थिक वर्ष ०.८१ प्रतिशत रहेको खराब कर्जा अनुपात घटाएर ०.२८ प्रतिशतमा सीमित राख्न सफल देखिएको छ। धेरै जसो बैंक खराब कर्जाले थिचिँदै जाँदा बैंकले त्यसमा सुधार गरेर विकास बैंकहरुमा आफूलाई अब्बल साबित गरेको छ।

बैंकको खुद शुल्क तथा कमिसन आम्दानी पनि बढेको छ। खुद शुल्क तथा कमिसन आम्दानी १ करोड ५० लाख रुपैयाँबाट बढेर ३ करोड २६ लाख रुपैयाँ पुगेको छ। यस्तै बैंकको खुद सञ्चालन आम्दानी ३५ करोड ३१ लाख रुपैयाँबाट घटेर ३१ करोड २२ लाख रुपैयाँमा झरेको छ।

१ अर्ब २१ करोड रुपैयाँ चुक्ता पूँजी भएको बैंकको रिटेन्ड अर्निङ १५ करोड ६१ लाख छ। यसैगरी रिजर्भको आकार ३४ करोड ४२ लाख रुपैयाँ छ। बैंकको वितरणयोग्य मुनाफा १५ करोड ६१ लाख रुपैयाँ रहेको छ। जस अनुसार बैंकको लाभांश क्षमता १२.८३ प्रतिशत छ। 

बैंकले चौथो त्रैमासमा १३ करोड ४ लाख रुपैयाँ बराबरको खुद नाफा आर्जन गरेको छ। यो रकम अघिल्लो आवको सोही अवधिको तुलनामा १०.०३ प्रतिशतले कम हो। अघिल्लो आवको चौथो त्रैमाससम्म २५ करोड ९७ लाख रुपैयाँ रहेको बैंकको खुद ब्याज आम्दानी २१.३२ प्रतिशतले घट्दै २० करोड ४३ लाख रुपैयाँमा सीमित बनेको छ। पछिल्लो समय ब्याजदर घटेका कारण बैंकको खुद व्याज आम्दानी घटेको हो।  

समीक्षा अवधिसम्म बैंकको प्रतिसेयर आम्दानी(ईपीएस)पनि १०.७१ प्रतिशत छ। यस्तै बैंकको प्रतिसेयर नेटवर्थ १४१.११ रुपैयाँ, मूल्य आम्दानी अनुपात ६४.२३ गुणा र तरलता अनुपात ३५.८६ प्रतिशत कायम भएको विवरणमा उल्लेख छ।