भदौ १८ गतेदेखि आरबिबि फोकस ४० बिक्री गर्दै आरबिबि मर्चेन्ट बैंकिङ

आबिबि मर्चेन्ट बैंकिङले आफ्नो व्यवस्थापनमा आरबिबि म्युचुअल फण्ड अन्तर्गत सञ्चालन हुने सामूहिक लगानी कोष आरबिबि फोकस ४० को इकाई भदौ १८ गतेदेखि विक्री गर्ने भएको छ । 

आरबिबि मर्चेन्टले प्रतिइकाई १० रुपैयाँ अंकित दरमा १ अर्ब रुपैयाँ बराबरको १० करोड आरबिबि फोकस ४० को इकाई बिक्री गर्न लागेको हो । त्यसमध्ये न्यूनतम १ करोड ४० लाख इकाई वा कुल बिक्री इकाई संख्याको न्यूनतम १४ प्रतिशत इकाई कोष प्रबद्र्धक राष्ट्रिय वाणिज्य बैंकका लागि र न्यूनतम १० लाख इकाई वा कुल बिक्री इकाई संख्याको न्यूनतम १ प्रतिशत इकाई योजना व्यवस्थापक आरबिबि मर्चेन्टका लागि सुरक्षित गरिएको छ । सर्वसाधारणले बाँकी ८ करोड ५० लाख इकाईका लागि आवेदन दिन सक्छन् ।

यस योजनामा न्यूनतम १०० देखि १ करोड इकाईसम्म आवेदन दिन सकिने छ । निष्काशन बन्द छिटोमा भदौ २२ गते र सयमै बिक्री नभएमा असोज १ गतेसम्म निष्काशन अवधि रहने छ । १२ वर्ष अवधिको आरबिबि फोकस ४० योजनाको इकाईमा लगानीकर्ताले नेपाल धितोपत्र बोर्डबाट अनुमति प्राप्त गरी सि आस्बा सेवामा सहभागी सम्पूर्ण बैंक तथा वित्तयि संस्थाहरु र तिनका शाखा कार्यालयहरुबाट आवेदन दिन सक्नेछन् । त्यस्तै, सिडिएस एण्ड क्लियरिङबाट निर्माण गरिएको सफ्टवेयर मेरो शेयर अनलाइन प्रयोग गरी सिआस्बा प्रणालीमार्फत पनि आवेदन दिन सकिनेछ ।

इकाई निष्काशनका लागि गराएको रेटिङमा केयर रेटिङ नेपालले कोष प्रबद्र्धकलाई केयर एनपी ए प्लस इस्यूअर रेटिङ र योजना व्यवस्थापकलाई इक्रा नेपालले इक्राएनपी एएमसी क्वालिटी ३ रेटिङ दिएको छ । 

यस योजनाले नेपाल स्टक एक्सचेन्ज (नेप्से)मा सूचीकृत कम्पनीहरुको धितोपत्रको आन्तरिक मूल्यांकन गरी उच्चतम प्रतिफल दिने सम्भाव्य ४० कम्पनीहरुलाई प्राथमिकतामा राखी लगानी गर्ने योजना बनाएको छ । साथै समय र परिस्थिति अनुसार मूल्यांकन गर्दा ४० वटा कम्पनीभन्दा बढी कम्पनीको शेयरमा समेत लगानी गर्न सकिने जनाएको छ ।