बजेट महत्त्वाकांक्षी आएको छैन, प्रक्षेपित जीडीपीको जम्मा २८ प्रतिशत मात्रै छ : अर्थमन्त्री वाग्ले

काठमाडौँ । अर्थमन्त्री डा. स्वर्णिम वाग्लेले आगामी आर्थिक वर्ष २०८३/८४ को बजेट प्रक्षेपित कुल गार्हस्थ्य उत्पादन (जीडीपी) को २८ प्रतिशत मात्रै आकारको ल्याइएको बताएका छन् । आइतबार अर्थ मन्त्रालयमा आयोजित पत्रकार सम्मेलनमा बजेटबारे प्रष्टीकरण दिँदै उनले बजारमा २५ खर्बको बजेट आउने हल्ला चलिरहेको भए पनि आफूले २१ खर्ब २४ अर्ब रुपैयाँको मात्रै बजेट ल्याएको स्पष्ट पारे । अर्थमन्त्री वाग्लेले आगामी आर्थिक वर्षका लागि नेपालको कुल गार्हस्थ्य उत्पादन (जीडीपी) ७४ खर्ब ५८ अर्ब रुपैयाँ पुग्ने प्रक्षेपण सरकारले गरेको जानकारी दिँदै सोही आधारमा बजेट तय गरिएको बताए । यसका साथै, सरकारले आगामी वर्षका लागि लिनुपर्ने सार्वजनिक ऋणको मात्रालाई कुल गार्हस्थ्य उत्पादनको ५ प्रतिशतको सीमाभित्रै राखेर बजेट ल्याएको भन्दै उनले कडा वित्तीय अनुशासन कायम गरिएको उल्लेख गरे ।

उनले भूकम्प र कोभिड-१९ पछि बजेटको आकार अस्वाभाविक रूपमा बढेको उल्लेख गर्दै अहिले त्यसलाई घटाएर भूकम्पअघिको यथार्थपरक ट्रेन्डमा फर्काइएको बताए । उनका अनुसार त्यतिबेला बजेट जीडीपीको २५ देखि २९ प्रतिशतबीच रहने गर्थ्यो, तर पछि ३७ प्रतिशतसम्म पुगेको थियो ।

अर्थमन्त्री वाग्लेले सार्वजनिक ऋणबारे उठेका प्रश्नको जवाफ दिँदै आगामी वर्ष सरकारले ३ खर्ब १८ अर्ब रुपैयाँ ऋण तिर्ने योजना रहेको जानकारी दिए। बाह्य ऋण २ खर्ब ४८ अर्ब र आन्तरिक ऋण ४ खर्ब १० अर्ब रहेको उल्लेख गर्दै उनले आन्तरिक ऋणको ठूलो हिस्सा पुरानै ऋण भुक्तानीमा प्रयोग हुने बताए ।

उनका अनुसार बजेट राष्ट्रिय स्वतन्त्र पार्टी (रास्वपा) को चुनावी वाचापत्रमा आधारित छ र यसले सुशासन, शिक्षा तथा स्वास्थ्यसहित मध्यम वर्गीय विस्तार, रोजगारी सिर्जना (१० देखि १२ लाख), पूर्वाधार तथा सहरी विकास र विदेशमा रहेका नेपालीको पुँजी नेपालमा भित्र्याउने पाँच मुख्य लक्ष्यलाई प्राथमिकता दिएको छ ।

सरकारले आगामी वर्ष १० देखि १२ लाख रोजगारी सिर्जना गर्ने लक्ष्य लिएको पनि उनले दोहोर्‍याए । अर्थमन्त्री वाग्लेले बजारमा बजेटको आकार र कार्यान्वयन क्षमताबारे देखिएको बहस स्वाभाविक रहेको भन्दै यो बजेट अंकभन्दा पनि संरचनात्मक सुधार र आर्थिक स्थायित्वमा केन्द्रित रहेको बताए ।