सानिगाड हाइड्रोको आइपीओमा आवेदन दिने आज अन्तिम दिन

काठमाडौं । सानिगाड हाइड्रो लिमिटेडको सार्वजनिक प्रारम्भिक प्रस्ताव (आईपीओ)मा आवेदन दिने आज (जेठ २१ गते) अन्तिम दिन रहेको छ । आज कार्यालय समयपश्चाय सानिगाडको आईपीओमा आवेदन दिन पाईने छैन ।

कम्पनीले जेठ १८ गते सोमबारदेखि सर्वसाधारण लगानीकर्ताहरुका लागि प्रतिकित्ता १०० रुपैयाँ अंकित मूल्यका ४६ लाख ७४ हजार कित्ता सेयर निष्काशन तथा बिक्री खुल्ला गरेको थियो । कम्पनीको जारी पूँजी २ अर्ब ८५ करोड रुपैयाँ छ । यसमध्ये ३० प्रतिशत अर्थात् ८५ लाख ५० हजार कित्ता सेयर सर्वसाधारणका लागि छुट्याइएको छ ।

कुल जारी पूँजीमध्ये १० प्रतिशत अर्थात् २८ लाख ५० हजार कित्ता सेयर बझाङ जिल्लाका आयोजना प्रभावित स्थानीय बासिन्दालाई यसअघि विक्री गरिसकिएको छ । सर्वसाधारणका लागि छुट्याइएको २० प्रतिशत अर्थात् ५७ लाख कित्ता सेयरमध्ये १० प्रतिशत अर्थात् ५ लाख ७० हजार कित्ता वैदेशिक रोजगारीमा रहेका नेपालीका लागि, कुल निष्कासनको ३ प्रतिशत अर्थात् १ लाख ७१ हजार कित्ता कर्मचारीका लागि र ५ प्रतिशत अर्थात् २ लाख ८५ हजार किक्ता सामूहिक लगानी कोषका लागि वित्री गरिएको छ । बाँकी ४६ लाख ७४ हजार कित्ता सेयरका लागि आज कार्यालय समयसम्म सर्वसाधारणले आवेदन दिन सक्नेछन् । 

सानिगाडको निष्कासनको बिक्री प्रबन्धक लक्ष्मी सनराइज क्यापिटल छ । लगानीकर्ताले न्यूनतम १० कित्ता र अधिकतम २० हजार कित्तासम्म आवेदन दिन सक्नेछन् । कम्पनीले आइपीओ निष्कासनका लागि गराएको रेटिङमा इक्रा नेपालले इक्रएनपी इस्यूअर रेटिङ ‘डबल बी माइनस’ दिएको छ। यसले कम्पनीको दायित्व बहन गर्ने क्षमतामा मध्यम जोखिम रहेको जनाउँछ ।

सन् २००७ डिसेम्बरमा स्थापित सानिगाड हाइड्रोले सुदूरपश्चिम प्रदेशको बझाङ जिल्लामा ३८.४६ मेगावाट क्षमताको माथिल्लो कालंगा गाड जलविद्युत आयोजना सञ्चालनमा ल्याइसकेको छ ।