असार १ देखि नयाँ डिम्याट खाता खोल्न राष्ट्रिय परिचय अनिवार्य

काठमाडौं । पूँजीबजारमा लगानीकर्ताको पहिचान प्रणालीलाई थप व्यवस्थित र विश्वसनीय बनाउन असार १ गतेदेखि नयाँ डिम्याट (हितग्राही) खाता खोल्दा राष्ट्रिय परिचय नम्बर अनिवार्य हुने भएको छ ।

सिडिएस एण्ड क्लियरिङ्ग लिमिटेड (सिडिएससी) ले सम्पूर्ण निक्षेप सदस्य (डीपी) हरूलाई पत्राचार गर्दै आगामी २०८३ असार १ गतेदेखि लागू हुने गरी यो व्यवस्था अनिवार्य गरिएको जानकारी दिएको हो ।

सिडिएससीको गत जेठ १३ गतेको निर्णयअनुसार यो व्यवस्था लागू गर्न लागिएको हो । यसअघि सिडिएससीले २०८२ फागुन १९ गते पत्राचार गर्दै ब्याक अफिस प्रणाली प्रयोग गर्ने निक्षेप सदस्यहरूलाई हितग्राहीको विवरणमा राष्ट्रिय परिचय नम्बर समावेश हुने गरी प्रणाली विकास गर्न आग्रह गरेको थियो । सोही तयारीका आधारमा अब यस व्यवस्थालाई पूर्ण रूपमा अनिवार्य रूपमा कार्यान्वयनमा ल्याउन लागिएको पत्रमा उल्लेख छ । त्यसैगरी, यसअघि खोलिएका डिम्याट खाताको ग्राहक विवरण (केवाईसी) अद्यावधिक गर्दा पनि राष्ट्रिय परिचय नम्बर समावेश गर्नुपर्ने व्यवस्था गरिएको छ ।

सिडिएससीका वरिष्ठ आइटी अधिकृत किशोर प्रसाद भट्टद्वारा जारी गरिएको सूचनामा नयाँ खाता खोल्दा वा पुराना खाताहरूको विवरण अद्यावधिक गर्दा राष्ट्रिय परिचयपत्र नम्बर अनिवार्य समावेश गराउन सबै निक्षेप सदस्यहरूलाई निर्देशन दिइएको छ । यस निर्णयबारे नियमनकारी निकाय नेपाल धितोपत्र बोर्ड (सेबोन) लाई समेत बोधार्थ जानकारी गराइएको छ ।

सिडिएसका अनुसार पछिल्ला वर्षमा डिम्याट खाताको संख्या उल्लेख्य रूपमा बढेसँगै लगानीकर्ताको एकीकृत पहिचान प्रणाली विकास गर्ने, दोहोरो खाता तथा त्रुटिपूर्ण विवरण नियन्त्रण गर्ने उद्देश्यले राष्ट्रिय परिचय प्रणालीलाई पूँजीबजारसँग आबद्ध गर्न लागिएको हो ।